Í vikunni var sett upp sýningin Nýsköpunarkeppni Snælandsskóla sem lauk með verðlaunaafhendingu í morgun, fimmtudaginn 16. maí. Keppnin er afrakstur vinnu nemenda á miðstigi í áfanganum Nýsköpun og hönnun þar sem nemendur æfðu sig í að skoða umhverfi sitt og finna skapandi lausnir á hinum ýmsu vandamálum. Í áfanganum völdu nemendur eina hugmynd til að senda í Nýsköpunarkeppni grunnskólanna og í framhaldinu kynntu þau sömu hugmynd í Nýsköpunarkeppni Snælandsskóla. Nemendur völdu sjálf hvernig þau útfærðu hugmyndirnar og útkoman var úrval af fjölbreyttum plakötum, módelum, frumgerðum og myndböndum.
Kennarar Snælandsskóla voru hvattir til að skoða sýninguna og kjósa þau verkefni sem þeim fannst standa upp úr. Þátttaka í kosningunni var góð og dreifðust atkvæðin á mörg verkefni, enda margar áhugaverðar, skemmtilegar og frumlegar hugmyndir til sýnis. Að lokum fengu níu nemendur, hönnuðir sjö hugmynda, viðurkenningu fyrir framúrskarandi verkefni og 1. verðlaun hlaut Ólafur Jarl Árnason í 5. bekk fyrir hugmyndina sína „Óflækjanleg heyrnartól“. Hann hlaut að launum þriggja mánaða áskrift að Lifandi vísindum/lifandi sögu, ísveislu hjá Ísbúð Vesturbæjar og spilið Tímalína-Uppfinningar. Við óskum vinningshöfunum til hamingju með frábær verkefni og þökkum nemendunum öllum fyrir frábæra sýningu. Það verður spennandi að fylgjast með þessum uppfinningamönnum framtíðarinnar.
Framúrskarandi verkefni
- sæti
Ólafur Jarl Árnason – Óflækjanleg heyrnartól
Snúran dregst inn í sjálf heyrnartólin líkt og snúran á ryksugu
Verðlaun: 3 mánaða áskrift að Lifandi vísindum/Lifandi sögu, ísveisla hjá Ísbúð Vesturbæjar og spilið Tímalína uppfinningar
- sæti
Guðný Sara Tómasdóttir og Matthildur Brynja Unnarsdóttir – Hvað er til?
App og skanni sem heldur utan um hvað er til í ísskápnum auðveldar innkaup og minnkar matarsóun
Verðlaun+: 3 mánaða áskrift að Lifandi vísindum/Lifandi sögu
- sæti
Brynja S. Jóhannsdóttir og Kolbrá Hlynsdóttir – Ruslaskrímslið
Tæki sem skynjar úr hvaða efni ruslið er og segir til hvernig á að endurvinna það
Kristín Þórdís Guðjónsdóttir – The Shopping Scrunch
Hárteygja sem inniheldur innkaupapoka svo þú gleymir pokanum ekki heima
Verðlaun+: 3 mánaða áskrift að Lifandi vísindum/Lifandi sögu
Viðurkenning
Sindri Gunnarsson – Réttindapeysan
Peysa sem minnir okkur á að við eigum öll skilið sömu réttindi
Katrín Ólafsdóttir – Remivana
Skartgripir sem hjálpa þér að muna
Brynjar Laufdal Hauksson – Seglar
Seglar sem koma í veg fyrir að blýantar rúlli fram af skrifborðum
Margrét Arna Vilhjálmsdóttir og Oktavía Gunnarsdóttir kennarar
