Snælandsskóli tók virkan þátt í Degi íslenskrar tónlistar þann 1. desember og átti þar sannkallaða hátíðarstund. Í ár var skólinn valinn til að flytja lagið „Eitt af blómunum“ ásamt tónlistarmönnunum Páli Óskari og Benna Hemm Hemm, sem heimsóttu skólann sérstaklega í tilefni dagsins og RUV mætti til að taka viðburðinn upp.
Áður hafði Margrét G. Thoroddsen, tónmenntakennari Snælandsskóla, stýrt æfingum af mikilli fagmennsku og alúð. Þær skiluðu sér sannarlega þegar upptökuteymi frá RÚV tóku upp flutninginn, enda sungu börnin af innlifun, fegurð og mikilli einlægni.
Viðburðurinn vakti einnig talsverða athygli og birtist umfjöllun um hann í sjónvarpsfréttum RÚV 1. desember, þar sem greint var frá þátttöku skólans í dagskrá Dags íslenskrar tónlistar, en eins og tónlistarmennirnir bentu réttilega á þá skiptir íslensk tónlist miklu máli þegar kemur að því að hlúa að og halda í íslenska tungu. Auk allra þeirra fallegu íslensku laga sem við eigum þá er býður tónlist og textavinna upp á svo marga möguleika við að vinna með málið og efla orðaforða.
Nemendur af öllum stigum tóku þátt í viðburðinum. Yngsta stigið hafði auk þess myndskreytt blóm sem sköpuðu litríkt og fallegt umhverfi fyrir samsönginn. Lagið „Eitt af blómunum“, sem fjallar um einelti, fékk djúpa og áhrifaríka merkingu í flutningi barnanna og minnti á mikilvægi samkenndar, virðingar og vináttu.
Þetta var einstök stund fyrir nemendur, sem eykur áhuga þeirra á íslenskri tónlist og textum. Það var virkilega gaman og heiður að fá þessa frábæru listamenn í skólann, og óhætt er að segja að margir hafi orðið meyrir eftir þennan fallega og tilfinningaríka söng.
Hér má sjá frétt frá RÚV
Hér má sjá frétt um þetta á RÚV https://www.ruv.is/frettir/innlent/2025-12-01-islensk-tonlist-besta-leidin-til-ad-halda-tungunni-ferskri-460326/
